Қазақстанда алғаш рет бағалы қағаздар орталық депозитарийлерінің форумы өтеді

23-26 қыркүйек аралығында Қазақстан алғаш рет Орталық Азия тарихында Дүниежүзілік бағалы қағаздар орталық депозитарийлері форумын (WFC 2025) қабылдайды. Бұл – аймақ үшін маңызды оқиға және Қазақстанның жаһандық қаржы жүйесіндегі өсіп келе жатқан рөлінің айқын көрсеткіші. Бұл туралы "Сапалы Қазақстан" порталы nformburo.kz сайтына сілтеме жасап хабарлайды. 

Басқосуды ұйымдастыруға 315 млн теңгеден аса қаражат бөлінді. Мәлімет Ұлттық банк пен соның ұйымдарының сатып алу порталында жарияланды.

Төрт күнге созылатын конференцияға 300 адам қатысады.

Тапсырыстың техникалық сипаттамасындағы мәліметке қарағанда, осы форумға қатысу үшін Алматыға кемі 200 адам келеді. Олар төрт күн бойы мегаполистің ең тартымды жерлерін аралайды:

• 23 қыркүйекте Әбілхан Қастеев атындағы мұражайда 200 адамға кешкі ас беріледі;
• 24 қыркүйекте Көктөбеде 250 адамға арналған гала-кешкі ас ұйымдастырылады;
• Ал 25 қыркүйектегі қоштасу кешкі асын өткізу үшін Әл-Фараби даңғылы бойындағы мейрамханада 200 адамға дастархан жайылады;
• 26 қыркүйекте 150 қонақ Шымбұлаққа шығып, төрт сағат бойы он атпен серуендеп, сол жердегі түрік мейрамханасында түстенеді.

Қала қонақтарына «Salem, Almaty» кітабы сыйға тартылады, деп жазды kz.kursiv.media. 

Форум әр екі жыл сайын ұйымдастырылады, ал 2025 жылғы іс-шараны Қазақстанның Орталық депозитарийі (KCSD) өткізеді. Алматыда өтетін форумға қаржы нарығы инфрақұрылымы саласындағы 250-ден астам халықаралық сарапшы, көшбасшы және ұйым басшылары қатысады. Қатысушылар қатарында Clearstream, DTCC, ADB, WFE, ISSA, GLEIF, ICMA секілді жетекші институттардың өкілдері бар. 

Алматының форум өтетін қала ретінде таңдалуы – KCSD басқарма төрағасы Еділ Медеудің 2023 жылы Прагада өткен форумда WFC кеңесінің төрағасы болып сайлануымен байланысты. Бұл шешім Алматының Орталық Азиядағы қаржы астанасы ретіндегі мәртебесін тағы да дәлелдеді.

"WFC – бұл тәжірибе мен үздік практикалар алмасу арқылы ынтымақтастықты дамыту алаңы. Ол пост-трейдинг индустриясының дамуына ғана емес, сонымен қатар қаржы институттары арасындағы өзара әрекеттестікті күшейтіп, жаһандық трендтерді қалыптастырады. WFC2025 форумының Алматыда өтетіндігі – біз үшін үлкен мақтаныш", – деді Еділ Медеу.

2025 жылғы форумның негізгі тақырыбы – "Бағалы қағаздар орталық депозитарийлерінің эволюциясы: сын-қатерлер, мүмкіндіктер және пост-трейд инфрақұрылымының болашағы".

Бағдарлама аясында жоғары деңгейдегі жеті панельдік сессия және үш тәжірибелік кейс-презентация жоспарланған. Онда жаңа технологиялар, реттеу тәсілдері, тәуекелдерді басқару, трансшекаралық нарықтарды біріктіру және қаржы нарығының өзгермелі жағдайында орталық депозитарийлердің даму жолдары қарастырылады. Форумға әлемнің түкпір-түкпірінен ұлттық депозитарийлер мен жетекші қаржы ұйымдарының өкілдері қатысып, тәжірибе және инновациялық шешімдермен бөліседі.

KCSD Қазақстанның өңірлік есеп айырысу хабы ретіндегі рөлін нығайтуда – заманауи технологияларды енгізіп, халықаралық стандарттарды ұстанып, бағалы қағаздарды сақтау мен есеп айырысу қызметтерін тек Қазақстанда ғана емес, бүкіл аймақ үшін де сенімді түрде қамтамасыз етуде.

Материал Informburo.kz6 kz.kursiv.media сайтnfhынан алынды.