Астанада 300-ден астам жолаушы мінген"Поттер пойызы" жолға шықты

Қазақстанда алғашқы "Поттер пойызы" сапарын бастады. Оған 300-ден астам жолаушы мінген.

Астанада отбасылық мәдени ойын-сауық жобасы — "Поттер пойызы" өзінің алғашқы сапарына аттанды.

Екі сағатқа созылған бұл ерекше саяхатқа 300-ден астам жолаушы, оның ішінде балалар мен ата-аналар қатысты. Сиқырлы пойыз 6 вагоннан тұрады. Әр вагонда жолаушыларға арналған жеке қойылым көрсетіліп, барлық вагонда бір мезгілде театрландырылған бағдарлама жүргізілді.

"Осы сапарда шамамен 15 актер Гарри Поттер әлемінің ең танымал кейіпкерлерін сомдады. Жолаушылар пойыз ішінде Гарри Поттерді, Гермиона Грейнджерді, Драко Малфойды, профессор Дамблдорды, Северус Снеггті, Доббиді және басқа да сүйікті кейіпкерлерді көрді. Әрбір актердің костюмі, бейнесі мен гримі мұқият әзірленді. Соның арқасында қатысушылар өзін нағыз сиқыр әлемінде жүргендей сезінді", - делінген хабарламада.

"Поттер пойызы" 12, 18, 19, 25 және 26 қазанда жолға шығады. Қараша айында да сиқырлы пойыздың қатынауы жоспарлануда.

Әр сапардың ұзақтығы — 2 сағат.

 Дерек көзі:https://sputnik.kz