Баланың желіге тіркелуі жасына қарай шектеле ме?

Мәжілісте балалардың әлеуметтік желіге тіркелуін жасына қарай шектеу ұсынылды. Бұл туралы "Сапалы Қазақстан" порталы qazaqstan.tv сайтына сілтеме жасап хабарлайды. 

Депутат Асхат Аймағамбетовтің айтуынша, 5-6 жастағы балалардың өзі TikTok пен Instagram-ға ата-ананың растауынсыз-ақ тіркеле алады. 

Асхат Аймағамбетов, ҚР Парламенті Мәжілісінің депутаты:

Бізде осы Цифрлық даму министрлігі мен Оқу-ағарту министрлігінің осы мәселе бойынша позициясы қандай? Осы заң жобасының шеңберінде біз осы норманы қарастыра аламыз ба? Мектептерде смартфон қолдануға мемлекеттік ұстаным бар ма? Англия, Нидерланд сияқты әлемнің 40 пайыздан астам мемлекеттерінде тыйым салу туралы шешім қабылдады. Біздегі кейбір алдыңғы қатардағы мектептер де осы тәжірибені енгізіп, нәтижесінде балалардың үлгерімі артты.

Аймағамбетов сонымен қатар өзінің Telegram арнасында әлеуметтік желілерді пайдалануға жас шектеулері туралы өз ұстанымын білдірді, деп жазды tengrinews.kz.

«Кіші ұлыммен серуендеп жүргенде, ауладағы әрбір баланың дерлік смартфоны бар екенін және олардың TikTok, YouTube және Instagram-да көретін контенті сүзгіден өтпегенін және ата-аналарының бақылауынан тыс екенін көрдім. 4, 5 және 6 жастағы балаларға сіріңке қорабынан да қауіпті құрылғы беріліп жатыр», - деп жазды депутат Асхат Аймағамбетов.

Депутат әлеуметтік желілер алгоритмдері балаларды ілмектеп, оларды экрандарға тәуелді ету үшін жасалғанын атап өтті.

«Негізінен, олар қалтаңыздағы сандық ойын автоматтары сияқты», - деді Аймағамбетов. 

Зерттеулерге сілтеме жасай отырып, Мәжіліс депутаты гаджеттерді шамадан тыс пайдалану балаларда зейін қою проблемаларына, ұйқының бұзылуына, мазасыздықтың жоғарылауына, агрессияға және тіпті суицидке әкелуі мүмкін екенін атап өтті.

«Смартфон – бала күтуші емес. Бізге жүйе қажет. Мүмкін, заңнамалық шектеулер қажет пе, жоқ па деген мәселені талқылауды бастау керек шығар. Әлеуметтік желілерге кіруге жас шектеулерін енгізуіміз керек пе (10-12-14 жас?)», – деп ұсынды Асхат Аймағамбетов.

Ал Жасанды интеллект министрінің орынбасары Дмитрий Мун әлем- балалардың әлеуметтік желіде тіркелуін жаппай тыйым салу арқылы емес, олар тұтынатын мазмұнды екшеп ұсыну арқылы реттеп жатқанын айтты. Ал, мектепте смартфон қолдануға тыйым салуға қарсы екенін жеткізді.

Фото: /pixabay.com.

Дмитрий Мун, ҚР Цифрлық даму, инновациялар және аэроғарыш өнеркәсібі вице-министрі:

Балалардың ата-ананың бақылауынсыз әлеуметтік желіде тіркелуіне қатысты айтсақ, қазір әлем керісінше әлеуметтік желіге қол жеткізудің түрлі жолдарын ұсыну жағын қарастырып жатыр. Бірақ белгілі бір жас шектеулері, контентті екшеп ұсыну тәжірибесі бар. Балалардың заман ағымынан, технологиядан кенже қалмай дамуына да басымдық берілуі керек. Сондықтан бізде де осындай форматта жұмыс жүргізіледі.